Rihararira nirizugana riezihiri na vandu vivivara vindi riajira vandu vavuguriraa mang'ana gizihiri muvodoto. Suwaraa unyara kogenda nuwiduya nutamanyi ihiri yoyo dave. Umwana muke aturi korovere yaraa amanyi oyo nuwuruvamba ki rwihiri nareve. Rwene rura mang'ana gavorwaa nigiranirwa vuri kazozo. Mukana niyadukaa yavorerwaa hosi hanyara kuzia na watanyara. Vayayi kandi navo.
Nogenda kunzira Ichambiti noho Ichavuri ma wayagana navang'erere vamakumbe vadukira koreta ma uvateve zihiri ziavo urarora varara nivakohenza nizimoni ziukukukunga. Haki? Varara varavora oveye mundu orondaa mang'ana gafwa, gavita, garaa ga kare. Vandu vaturayo. Vandi varavora yivi numuzivanyi, wenyaa orete rigavukana ria vandu, oveye mundu wi inditi. Varara varakogenyera, ki kikuzii mu mutwi.
Na gakare mba. Na gakarunu! Nuwenyi kumanya sekevee kuho kindu chovora chavitwa ni inyinga, wehenze ma weteve, yivi uvitii kindiki vakurundu va kare? Noho mbaa, vogeri ki vwajira vakaraga mang'ana marara?
Kumanya ihiri yoyo nu kuva nuvurungi vwi rimenya harara nukuhana ruyari. Vandu vayanzaa kuzugana harara vamanyi vaveeye vizihiri rugano. Ndio vurina vwa dinyaa muno.
Kijiraa nekovora novodoto koreta mwiko kutanga ni kuturana ne riva rie zihiri sizikivambaa zivamba mba. Uranyora ihiri nunu eveye na vandu zierefu na vosi virangaa Nareve. Mwana anyara koreta yo dave kinga vaguga vari va kare ivo varaa harara.
Kaviri ni kijira vandu sivakitizaa vwiko vwa viko dave. Mundu aretaa wa isi yareta. Noho aretaa wa guku yadeka. Muvunyingi ma vasuviraa na vana veng'ine vwu vwiko vohenzwaa. Dave, mugizi gwosi genyaa gohenzwe.
Mang'ana ga vasaza nindi vakari korekana kandi gaakiri. Rirekana rira rijiraa riaivura vwiko kare. Ku vandu vamaa vivirira vwangu genago vazizagirira imbiri. Na murihenza mukari undi sigenyaa ohenze mu nyumba yu waturizayo wukutanga dave. Genyaa ohenze handi. Nohenzi yo kandi ku ovezaa odekizi mwiko.
Vateverizi vageha madiku gano. Varaa vandu vikura. Madiku gano muyayi iyo muteverizi nu mutevwa umukana. Ha vavezaa vamanyi mang'ana ki? Na masahi gavezaa gavashiuhi mumuviri. Nirwo rwa vakurundu vahenzaa muvo niva vwiko vuturiraa havundu ma vavora, 'Dave, mugumiriri engoko, yazia koreta ruswa.' Noho, 'Yee, vwiko nuvwihare, nigaduu imaa iria kugavo,' ma vava vamarii.
Ni yago genyine mba, gandi manyingi gaveeho ganyara kujira viko varetane. Kuri rimenya ihare na yengo ma vandu vasuvira, 'o, yavo vatura kivara kindi,' na ngani na vana vinyu! Ku genyaa mundu ava moni.
Comments
Post a Comment