Saying 28

-Nuwaramwa sumanyaa

Kiramo neriva riokomenya nimbara yamagoso kuturana kokekorwa, riganagania, rivora noho rivurwa mumasahi gataveye masereze. Kanyingi kiramo kitivurwaa numundu yagoserwa noho kituranaa kumashioro gakoreywi. Handi mundu nagosaa sanyara kumanya mba, nasuviraa avee vurahi ngani agendaa mukisundi.

Kovore kuri muraru agendaa nadora visara namadari kandi agashiuva, nasekerera kivihiri, vujira kuruha kogenda kuzisogoni ihare nihare, kandi ndio kiramo kihindiraa mumundu. Unyara kwihurira mwangu, mugasu, muyanzi, muderwa ninyuma virokaroko vihindira. Nirwo rwomororaa mang'ana gekoreka muzingo gataveye magasu, nirwo rwomororaa riguyaguya kuvandu varaa samu, nirwo rwikivihiri makiduka.

Muinzira ndara noho yindi, vosi kogendaa nikiramo nareve. Kwayivurirwa mumasahi gakwavura kumanya inyuma yira, vakoraki, ki chavaragwa nivavura kokora, vona ndi nasivashiora, nimbara ki yaveretera. Nikumanyi yaga kunyara kwituriza muviramo viakutamanyi.

Avuraho mundu anyara kwambakana aveye musereze, munifu, munyururuku. Gekorekaa mumwoyo gwumundu numuzinganagani kari nuwaraa ogoni ganyara kuva gikiramo. Chuwakora novee mwana, ring'ana riuwativurirwa muvwana, nivindu vinyingi, viosi vinyara kokoronda. Kenene nukushiora. Icho chajiraa vasakuru vakare vakora mima shimbi kushimbi, nivaragura, veyogiza, vevohorora. Nakunyi, indio kokoraa kweri?