Saying 30

~Kidundu kihindiraa numuruhu gwacho.

Kidundu nikisara kindi nang'ana rusie mbong'erere na keveye nizingedu kuri mukonye nanikihindii kidinyaa kuri chavasungu varangaa 'bamboo'. Hagati hacho numuruhu.

Visara vie vidundu vimeri havundu mavinaraaho beyi. Viayanzirira kumazi numuvivanda. Virara vijira vitambi kuvindi ni vindi vimbigidi kuvyo kijira nikisaraa kitambihaa. Nanohenza vurahi rwa mavivezaa vitemwi uranyora viveye nimiruhu ruganorugano, virara  miruhu mineneku nejindi miruhu midiku.

Shagazaa murugano genaga nagavakuru vene vamanyi. Kunyi vamadikaaga korondizaaza mang'ana. Rurara kunyara kuganagania gatenyekaa. Mugirigari ruganiru nurwokovora uruyari rwumundu avezaa narwo noho miima nakivara jituraa muvwana kudukana nirikarirwa ririe mukivara.

Muruhu gwenigu gunyara kuva iriesiha ryu mundu, vunyari vwivwe, vudukiru, zinganagani, vikorwa, riiva, ridamana, rigehera nevindi vindu vinyingi korondekana nashagekorekaa. Vandu sivafananaa na vikorwa viavo sivirenganaa, nasigenyaa korenganyia kijira sinuvuyanzi vwu mundu kuva shavee navuzwa nizimbavasi zinene mundu kuva neriva ririe rugano navandi.