Saying #14

-Yazia muchitu nadora risagati -

Yazia - he/she went
Muchitu - to the market
Nadora - and picked
Risagati - withered branch, dry leaves

Esogoni eveyeku ne vindu rugano rugano. Vanadi na vaguri vajirayo kuvunyingi. Vindu vigurizwaa nukugurika nirugano rugano. Koveyeho neviukuria, zinguvu, zinyingu nivigongamiru kivara bei. Niwenyi viugi, esogoni idakaa mba.

Riyoga riakira yo. Vuyu arangiraa yira, undi yimbiraa hara, eng'ombe yavashiri kuguriza niyana kivihiri kijira inzara. Vararu vayanza esogoni kijira varahevwa ku mengu nimikado jigundaa. Imbura nikubi kosogoni madoshi gajira ku manyingi. Yiku nokorondekana nuvumwamu vuturanaa kuvindu viguranywaa.

Ku Parafandara navoreve yazia kosogoni ma natura yo nirisagati! Sigakavee gukuhaga noho ndi? Mundu nazii kosogoni nivihera vivie amaa yenya aturi yo numutugu mugasu, iviukuria vinifu kandi viguriru virahi. Mundu nakugurizii kindu kidamanu unyara kumushira kurushia kuduka ashiore vonene mbitirira. Navuzwa mwanitu yadora risagati.

Risagati ni kindu kivura mazami, chafwa, kari vandu vaikara kumatu gene mpaka gavunguruka. Chatigara nikisara vuza, kikubiraa riyoga imbuza nivita. Yaga ni kumanyia rugano yiru nurukunikiru kijira aveyekuho mundu wumutwi murungi anyara kodora risagati ma yidudi nazia nario yengo mba.

Irisagati nu mukari kidwadi, mundu wi kikaye aveye muswerereko gwa vandu vasaza. Si avezaa mukana yirinda mba navuza yayivagara kuri kivambara. Munwa gwigwe nevikorwa vivie siviyanzizaa. Vandu vamaa vamuhenzera ihare. Rwa mundu atamanyi amang'ana gumukari wenuyu ma amuvugura ashira mumba kovoraa 'adoo risagati'.